ચંદ્રયાન-3એ લેન્ડર ઈમેજર કેમેરાથી ધરતી અને ચંદ્રનો મોકલ્યો ફોટો, હવે મિશનથી આટલા કિ.મી. જ દુર

 

ચંદ્રયાન-3એ લેન્ડર ઈમેજર કેમેરાથી ધરતી અને ચંદ્રનો મોકલ્યો ફોટો, હવે મિશનથી આટલા કિ.મી. જ દુર

ઈસરોએ આજે ચંદ્રયાન-3 દ્વારા ધરતી અને ચંદ્રની તસવીર મોકલાઈ હોવાની માહિતી શેર કરી

નવી દિલ્હી, તા.10 ઓગસ્ટ-2023, ગુરુવાર

ભારતના મહત્વાકાંક્ષી પ્રોજેક્ટ ચંદ્રયાન-3 મિશન સતત આગળ વધી રહ્યો છે. ચંદ્રયાન-3 ચંદ્રની ઘણી નજીક પહોંચી ગયો છે. દરમિયાન ઈસરોએ આજે ચંદ્રયાન-3ને લઈ મહત્વની જાણકારી શેર કરી છે. ઈસરોએ ટ્વિટ કરીને જણાવ્યું કે, ચંદ્રયાને લેન્ડર ઈમેજર કેમેરાથી ધરતી અને ચંદ્રની ફોટો મોકલી છે.

ચંદ્રયાન-3એ ધરતી-ચંદ્રની તસવીર મોકલી

ચંદ્રયાન-3એ ચંદ્રના ત્રીજા ઓર્બિટમાં પહોંચ્યાના એક દિવસ બાદ આ તસવીર મોકલી છે. આ તસવીર લેન્ડર હોરિજોટલ વિલોસિટી કેમેરાથી કંડારાઈ છે. ઉલ્લેખનિય છે કે, 14મી જુલાઈના રોજ ચંદ્રયાન-3 લોન્ચ કરાયું હતું. ત્યારથી જ ચંદ્રયાન-3 એક પછી એક સ્ટેપ્સ સફળતાપૂર્વક પાર કરી રહ્યો છે. ચંદ્રયાન-3 પાંચમી ઓગસ્ટના રોજ ચંદ્રની ભ્રમણકક્ષામાં પ્રવેશ્યું હતું.

ચંદ્રયાન-3 ચંદ્રની ધરતીથી માત્ર આટલું દુર

ઈસરોએ બુધવારે ટ્વિટ દ્વારા માહિતી આપી હતી કે, ચંદ્રયાન-3 ચંદ્રની ધરતીની ખુબ જ નજીક પહોંચી ગયું છે. ઉપરાંત ઈસરોએ કહ્યું હતું કે, ચંદ્રયાન-3 ચંદ્રની ધરતીથી માત્ર 174 કિલોમીટર x 1437 કિલોમીટર દુર છે. તેમણે કહ્યું કે, આગામી ઓપરેશન 14 ઓગસ્ટ-2023ના રોજ 11.30થી 12.30 કલાક વચ્ચે નક્કી કરવામાં આવ્યું છે.